2016 yilning eng yaxshi ayol futbolchisi sifatida taqdirlangan Karli Lloyd AQSH terma jamoasidagi yorqin o‘yinlari tufayli bir yil oldin ham ushbu sovringa ega chiqqandi. Taqdirlash marosimidan so‘ng FIFA.com sayti mahoratli futbolchining fikrlari bilan qiziqdi.
- Mazkur mukofotga yana bir bor munosib ko‘rilganingizdan so‘ng ko‘nglingizdan qanday hislar kechmoqda?
- Qatorasiga ikki yil jahonning eng yaxshi ayol futbolchisi bo‘lish - katta sharaf. Bundan keyin ham faqat yuksak cho‘qqilar sari intilaman. Ammo asosiy maqsadim - jamoam bilan sovrinlarni qo‘lga kiritish.
- Siz uchun 2016 yilning eng yaxshi lahzasi qaysi va nima uchun?
- 2016 yilning eng unutilmas voqeasi - maktabdosh do‘stim Brayyanga turmushga chiqdim. Faoliyatim davomida ko‘plab turnirlarda ishtirok etdim, sovrinlarni qo‘lga kiritdim. Ammo baribir, hayotda eng muhimi - oila.
- To‘yingiz paytida jahon chempionati finalidagidanda ko‘proq hayajonlandingizmi?
- Umuman olganda, o‘yinlar men uchun odatiy holga aylangan. Har bir uchrashuvdan oldin bir xil holat kuzatiladi. Shunday ekan, u finalmi yoki oddiy o‘yinmi, men uchun farqi yo‘q. Lekin to‘y marosimi hayotda bir marta bo‘ladi.
- Faoliyatingizni qachon yakunlamoqchisiz?
- Maqsadim - 2020 yili Tokioda bo‘lib o‘tadigan Olimpiya o‘yinlarida ishtirok etish. Shundan so‘ng butsalarimni mixga ilsam kerak. Undan keyin nima bo‘lishini vaqt ko‘rsatadi. Balki murabbiylik sohasiga o‘tarman yoki televidenieda ekspert sifatida ishlarman. Biroq eng avvalo, bor e’tiborimni oilamga qarataman.
