2016 йилнинг энг яхши аёл футболчиси сифатида тақдирланган Карли Ллойд АҚШ терма жамоасидаги ёрқин ўйинлари туфайли бир йил олдин ҳам ушбу совринга эга чиққанди. Тақдирлаш маросимидан сўнг FIFA.com сайти маҳоратли футболчининг фикрлари билан қизиқди.
- Мазкур мукофотга яна бир бор муносиб кўрилганингиздан сўнг кўнглингиздан қандай ҳислар кечмоқда?
- Қаторасига икки йил жаҳоннинг энг яхши аёл футболчиси бўлиш - катта шараф. Бундан кейин ҳам фақат юксак чўққилар сари интиламан. Аммо асосий мақсадим - жамоам билан совринларни қўлга киритиш.
- Сиз учун 2016 йилнинг энг яхши лаҳзаси қайси ва нима учун?
- 2016 йилнинг энг унутилмас воқеаси - мактабдош дўстим Брайянга турмушга чиқдим. Фаолиятим давомида кўплаб турнирларда иштирок этдим, совринларни қўлга киритдим. Аммо барибир, ҳаётда энг муҳими - оила.
- Тўйингиз пайтида жаҳон чемпионати финалидагиданда кўпроқ ҳаяжонландингизми?
- Умуман олганда, ўйинлар мен учун одатий ҳолга айланган. Ҳар бир учрашувдан олдин бир хил ҳолат кузатилади. Шундай экан, у финалми ёки оддий ўйинми, мен учун фарқи йўқ. Лекин тўй маросими ҳаётда бир марта бўлади.
- Фаолиятингизни қачон якунламоқчисиз?
- Мақсадим - 2020 йили Токиода бўлиб ўтадиган Олимпия ўйинларида иштирок этиш. Шундан сўнг бутсаларимни михга илсам керак. Ундан кейин нима бўлишини вақт кўрсатади. Балки мураббийлик соҳасига ўтарман ёки телевидениеда эксперт сифатида ишларман. Бироқ энг аввало, бор эътиборимни оиламга қаратаман.
