Xitoyda bo‘lib o‘tgan MMA universal turdagi janglar bo‘yicha chempionatda rossiyalik Ibragim Xalilov o‘zbekistonlik Baxtiyor Barotov bilan bellashdi.

Ammo jang bor yo‘g‘i 3 soniya davom etdi. Gap shundaki, Xalilov hamyurtimiz Barotovni salomlashuv paytida urib, nokaut qilishga muvaffaq bo‘ldi. Natijada hakamlar g‘alabani rossiyalik sportchiga berishdi.

Bu voqea MMA ixlosmandlarini g‘azabga soldi va ular Xalilovni noprofessionallikda ayblashdi. Yaqinda Xalilovning o‘zi bu voqeaga izoh berdi.

«Biz jangdan oldin salomlashdik, ko‘rishdik. Keying bong urildi va jang boshlandi. To‘g‘risini aytsam, ikkinchi marta ko‘rishishni hayolimgayam keltirmagandim. To‘g‘ri u qo‘lini oldinga uzatdi, ammo men bunday harakatni zarba yo‘llashga urinish deb qabul qilaman, salomlashyapti deb o‘ylamayman. Boshqa janglarimniyam ko‘rib chiqing, dastlabki soniyalardanoq zarba yo‘llayman. Bong yangrashi bilanoq oldinga tashlanaman.

Bilmadim, bundan buyon bu haqda raqibni oldindan ogohlantirishim kerakmikan. Ammo bo‘lar ish yuz berib bo‘ldi. Jangdan so‘ng uning ahvoli haqida qiziqsam, yordamchilarim hammasi joyida, o‘ziga keldi deb aytishdi» - dedi Xalilov Match TV xabarida.