Iordaniyaning Amman shahrida 21 yanvar kuni ayollar o‘rtasidagi Osiyo Kubogi–2018 saralash bosqichiga qur’a tashlash marosimi bo‘lib o‘tdi.
Qur’a natijasiga ko‘ra, O‘zbekiston ayollar terma jamoasi “B” guruhidan joy oldi. Mazkur guruhda terma jamoa Janubiy Koreya, Gonkong, Hindiston va KXDR ayollar termasiga qarshi bahs olib boradi.
“B” guruhi uchrashuvlari 3–11 aprel kunlari KXDRda bo‘lib o‘tadi. O‘zbekiston ayollar terma jamoasining o‘yin taqvimi quyidagicha:
3 aprel. O‘zbekiston – Gonkong
7 aprel. O‘zbekiston – Hindiston
9 aprel. O‘zbekiston – KXDR
11 aprel. O‘zbekiston – Janubiy Koreya
Reglamentga ko‘ra, faqatgina guruh bosqichida zafar quchgan terma jamoa Osiyo Kubogi–2018 turnirining final bosqichiga yo‘llanma oladi. O‘z guruhida g‘alaba qozongan terma jamoalar Yaponiya, Avstraliya, Xitoy (Osiyo chempionati–2014 yakuniga ko‘ra eng yuqori reytingga ega bo‘lgan jamoalar) hamda Iordaniya (turnir mezboni)ga qo‘shiladi.
Shu tariqa, 2018 yilning 7–22 aprel kunlari bo‘lib o‘tadigan Osiyo chempionati final bosqichida jami 8 terma jamoa ishtirok etadi. Final bosqichida eng yaxshi natijani qayd etigan besh terma jamoa Fransiyada iyun/iyul oylarida bo‘lib o‘tadigan ayollar o‘rtasidagi JCH–2019 musobaqasiga yo‘llanma oladi.
