«Olmaliq» klubi Ukrainaning «Karpati» klubiga qarshi o‘rtoqlik o‘yinini o‘tkazdi.
Bu safar jamoa Antaliyadagi g‘alabali seriyasini davom ettira olmadi.
Bu o‘yinda avvalgi tarkibga nisbatan bir qator o‘zgarishlar amalga oshirildi. Bir necha futbolchi boshqa ampluada sinab ko‘rildi. Bu esa o‘yin strategiyasiga ma’lum o‘zgarishlar olib keldi. Keskin va shiddatli tarzda o‘tgan bahsda «Olmaliq» biroz qo‘pol o‘yin namoyish etishdi. O‘yinni boshqarib borgan hakamning ko‘p vaziyatlarda raqib foydasiga qaror chiqarishi ham bunga sabab bo‘ldi.
Bevosita o‘yinga to‘xtaladigan bo‘lsak, uchrashuvning 33-daqiqasida zaxiradan maydonga tushganiga ko‘p bo‘lmagan raqibning argentinalik hujumchisi Konte hisobni ochdi. Ikkinchi taymni faolroq boshlagan «Olmaliq» futbolchilari 62-daqiqada hisobni tenglashtirishga muvaffaq bo‘lishdi. Gol muallifi Momchilo Dulovich. Raqibning ilk hujumi esa yana hisobni o‘zgartirib yubordi. Vladislav Kasminin kutilmaganda o‘z darvozasini ishg‘ol etdi. 67-daqiqada jarima maydoni ichida Shavkat Mullajonov qo‘pollik ishlatgan deb topildi va darvozamiz tomon penalti belgilandi. Bundan raqib futbolchisi Chachua unumli foydalanib hisobni 1:3ga yetkazdi. Qolgan daqiqalarda darvozalarga boshqa to‘p kiritilmadi.
Kichik jarohat sabab Zabihillo O‘rinboyev bu o‘yinda maydonga tushmadi. Igor Yelich esa kecha o‘z yurtiga jo‘nab ketgandi. U jamoamizning navbatdagi yig‘inida ham ishtirok etadi.
O‘rtoqlik uchrashuvi. 24 yanvar
"Top kape" sport majmuasi. Antaliya
"Olmaliq" - "Karpati" 1:3
Gollar: Momchilo Dulovich 62 - Konte 33, Vladislav Kasminin 63 avtogol, Chachua 67 penalti.
Chetlatish: Shavkat Mullajonov 67 (ikkinchi ogohlantirish)
"Olmaliq": Xurshid Xodjayev, Islom Inomov, Shavkat Mullajonov, Vladislav Kasminin, Momchilo Dulovich, Xurshid Muxtorov, Shohnazar Norbekov, Dilshod Jo‘rayev, G‘ulom-Haydar G‘ulomov, Alibobo Rahmatullayev, Altimurot Annadurdiyev.
Zaxiradan maydonga tushganlar: Rahmatillo Berdimurodov, Muhammad Isayev, Doniyor Usmonov, Viktor Klishin.
Hakam: Naxit Xasiyev (Ozarbayjon)
