Yurtimizda boks nafaqat erkaklar balki ayollar orasida ham jadallik bilan rivojlanmoqda. 23-yanvar kuni poytaxtimizda aynan ayollar o‘rtasida boks bo‘yicha 2017-yil taqvimidan o‘rin olgan ilk turnir – O‘zbekiston kubogi musobaqasi start oldi.

2016-yil Rio de Janeyro shahrida bo‘lib o‘tgan yozgi Olimpiya o‘yinlarida ishtirok etgan Yodgoroy Mirzayeva (-51kg) o‘zi kabi yosh bokschi qizlarga erishish mumkin bo‘lgan yangi marrani taqdim etdi. Endilikda, Respublikamizning turli viloyatlarida ayollar boksiga bo‘lgan qiziqish ortib, ushbu sport turi bilan muntazam tarzda shug‘ullanuvchi qizlar soni oshib bormoqda.

O‘zbekiston Boks Federasiyasi 2017-yildan boshlab har yili ayollar orasida mamlakat kubogi musobaqasi tashkil qilib, bokschilar orasidagi yuzaga kelayotgan sog‘lom raqobatni yanada qo‘llab quvvatlashni maqsad qildi. 23-yanvar kuni Toshkent shahrida start olgan mazkur musobaqa janglarini Boks bo‘yicha ayollar terma jamoasi murabbiylari sinchkovlik bilan kuzatib borishmoqda.

Ilk bor tashkil qilingan O‘zbekiston kubogi musobaqasida malakatimizning sakkiz viloyati va Toshkent shahrida boks bilan shug‘ullanuvchi 90 nafar sportchi g‘oliblik uchun kurashga kirishdi. Janglar 9 ta vazn toifasida bo‘lib o‘tmoqda. Turnirda umumiy hisobda 81 ta jang bo‘lib o‘tishi ko‘zda tutilgan. Ta’kidlash kerak, 23-yanvar kuni yengil vazn toifalaridagi janglar bilan boshlangan turnir 27-yanvar kunigacha davom etadi va aynan shu kuni barcha vazn toifalarida final janglari bo‘lib o‘tadi.