Юртимизда бокс нафақат эркаклар балки аёллар орасида ҳам жадаллик билан ривожланмоқда. 23-январ куни пойтахтимизда айнан аёллар ўртасида бокс бўйича 2017-йил тақвимидан ўрин олган илк турнир – Ўзбекистон кубоги мусобақаси старт олди.

2016-йил Рио де Жанейро шаҳрида бўлиб ўтган ёзги Олимпия ўйинларида иштирок этган Йодгорой Мирзаева (-51кг) ўзи каби ёш боксчи қизларга эришиш мумкин бўлган янги маррани тақдим этди. Эндиликда, Республикамизнинг турли вилоятларида аёллар боксига бўлган қизиқиш ортиб, ушбу спорт тури билан мунтазам тарзда шуғулланувчи қизлар сони ошиб бормоқда.

Ўзбекистон Бокс Федерацияси 2017-йилдан бошлаб ҳар йили аёллар орасида мамлакат кубоги мусобақаси ташкил қилиб, боксчилар орасидаги юзага келаётган соғлом рақобатни янада қўллаб қувватлашни мақсад қилди. 23-январ куни Тошкент шаҳрида старт олган мазкур мусобақа жангларини Бокс бўйича аёллар терма жамоаси мураббийлари синчковлик билан кузатиб боришмоқда.

Илк бор ташкил қилинган Ўзбекистон кубоги мусобақасида малакатимизнинг саккиз вилояти ва Тошкент шаҳрида бокс билан шуғулланувчи 90 нафар спортчи ғолиблик учун курашга киришди. Жанглар 9 та вазн тоифасида бўлиб ўтмоқда. Турнирда умумий ҳисобда 81 та жанг бўлиб ўтиши кўзда тутилган. Таъкидлаш керак, 23-январ куни енгил вазн тоифаларидаги жанглар билан бошланган турнир 27-январ кунигача давом этади ва айнан шу куни барча вазн тоифаларида финал жанглари бўлиб ўтади.