Qibrayda “Navbahor” va “So‘g‘diyona” jamoalari o‘rtasidagi nazorat o‘yini o‘tkazildi.

O‘yinning birinchi bo‘limida urilgan yagona gol “So‘g‘diyona”ning g‘alabasini ta’minladi.

Uchrashuvning birinchi bo‘limi teng kurashlar ostida o‘tgan bo‘lsa-da, jizzaxliklar hisobni ochishga erishishdi. Raqib futbolchisi 25 metrlardan belgilangan jarima zarbasini golga aylantirishni uddasidan chiqdi. Eminovning zarbasidan keyin to‘p darvoza ustuniga tegib to‘rdan joy oldi.

Tanaffusdan keyin "Navbahor" hisobni tenglashtirish uchun bir qator hujumlar tashkil etishdi. Gol urish uchun imkoniyatlar bo‘lsa-da, vaziyatlardan foydalanishda aniqlik yetishmadi. Ikkinchi bo‘lim o‘rtalarida har ikki jamoa a’zolari o‘zaro tortishib ketishdi. Shu sababli hakam uch nafar futbolchiga qizil kartochka ko‘rsatdi. "Navbahor"dan Alisher Mahmudov va Alisher Mirzayev maydondan chetlatilishdi. Nazorat o‘yini bo‘lganligi sababli o‘yinchilar sonini tenglash maqsadida Ravshan Xursanov yana safga qo‘shildi.

Uchrashuvni "Navbahor" quyidagi tarkibda o‘tkazdi: Asilbek Omonov, Jahongir Mehmonov, G‘iyos Komilov, Tohir Shamsiddinov, Alisher Samatov, A’zam Aliyev, Dilshod Jabborov, Oybek Qilichev, Mirzohid G‘ofurov, Ro‘zimboy Ahmedov, Ravshan Xursanov. Zaxiradan maydonga tushganlar: Azizbek Turg‘unboyev, Alisher Mahmudov, Hasanboy Ergashev, Abduaziz Sultanov, Akmal Ortiqov, Abbos Otaxonov, Ilhom Boydedayev, Alisher Mirzayev.

O‘yinda serbiyalik hujumchi Nemanya Yovanovich ishtirok etmadi. Legioner futbolchi alohida mashg‘ulot o‘tkazish bilan cheklandi. Yana bir darvozabon Nodir Ashurmatov esa zaxirada qoldirildi.