Kecha Andijonda, kasaba uyushmalarining anjumanlar zalida viloyat hokimi yig‘ilish o‘tkazdi. Unda «Andijon» jamoasi rahbariyati, murabbiylar shtabi, futbolchilar, «UzDongJu» jamoasi vakillari va viloyatdagi futbolga ixtisoslashtirilgan maktab internati rahbari, murabbiylar, yosh o‘smir futbolchilar hamda ishqibozlar klubi faollari ishtirok etdi.

Bundan ko‘zlangan maqsad, ortda qolgan 2016 yilda yo‘l qo‘yilgan xatolar, «Andijon» jamoasining oliy ligani tark etgani, umuman, klubning qoniqarsiz natijasi haqida so‘z bordi. Endilikda ushbu yo‘l qo‘yilgan xatolarni boshqa takrorlamaslikka, viloyat futboli infratuzilmasini yanada mustahkamlash uchun jiddiy ish olib borish kerakligi, belgilangan yillik byudjetdan to‘g‘ri va aniq dastur asosida foydalanish to‘g‘risida Andijon viloyati hokimi Shuhratbek Abdurahmonov qattiq kuyunib gapirdi.

2017 yilda «Andijon» jamoasini kuchlilar safiga qaytishi nihoyatda muhim ekanligi ham ta’kidlab o‘tildi. Shuningdek, viloyat hokimi yig‘ilishda bolalar futbolida mustahkam poydevor qurish, mahalliy futbolchilar bilan ko‘p yillik shartnomalar imzolash, ular uchun har tomonlama qulay sharoitlarni yaratib borish, kelgusida «Andijon» jamoasi uchun zamonaviy tarzda qarorgoh barpo etish va bu ustida yaqin orada qurilish loyihasini ishlab chiqish lozimligini tegishli mas’ul hodimlarga vazifa qilib belgilab berdi.

Yig‘ilishda viloyat futbol federasiyasi birinchi vise-prezidenti Azizbek Sulaymonov, «Andijon» FK vise-prezidenti Jahongir Madixonov ham so‘z olib o‘z fikrlarini bildirib o‘tdi.

Qolaversa, «Futbolga ixtisoslashtirilgan maktab internati» tarbiyalanuvchilari nomidan Abduvohid ismli iqtidorli futbolchi ham berilgan imkoniyatdan foydalanib so‘zga chiqar ekan, 2016 yilda bir nechta musobaqalarda g‘oliblik nashidasini surishgani, kelgusida eng asosiysi «Andijon» va «UzDongJu» jamoasi uchun munosib professional futbolchi bo‘lib yetishishiga vada berib, buning uchun mashg‘ulotda o‘z ustilarida jiddiy ishlashlarini aytib o‘tdi.

Ishqibozlar faollari nomidan Nodirbek To‘ychiyev ham so‘zga chiqib, viloyat hokimiga futbolga qaratayotgan e’tibori va ko‘rsatayotgan amaliy yordami uchun muxlislar nomidan minnatdorchilik bildirgan xolda jamoani har qanday xolatda qizg‘in qo‘llab-quvvatlashlarini aytib, klub rivoji yo‘lida o‘z takliflarini bildirib o‘tdi.

Viloyat hokimi endilikda haftaning ma’lum bir kunida futbol sohasida faoliyat yuritayotgan vakillar bilan uchrashuv tashkil etish borasida taklif kiritib, qishloq va tumanlarda  ommaviy futbolni rivojlantirish, yoshlar ishtirokida turli xil musobaqalarni tashkil etish borasida ham takliflarni o‘rtaga tashladi.

Shu tariqa ishchan va samimiy ruhda kechgan yig‘ilish o‘z yakuniga yetdi.