Sport muxlislariga yaxshi ma’lum O‘zbekiston bokschilari bugungi kunda ushbu sport turi bo‘yicha dunyo miqyosida eng yetakchilardan sanalishadi.

O‘tgan yaqin yillar ichida bokschilarimiz nufuzli xalqaro turnirlarning deyarli barchasida ishtirok etib g‘olib va sovrindor bo‘lishga muvaffaq bo‘ldilar. Sportda g‘alabaga erishishdan ko‘ra uni ushlab qolish qiyinroq degan tushuncha mavjud.

Mazkur holatni yaxshi anglagan O‘zbekiston Boks Federasiyasi mutasaddilari o‘smirlar va yoshlar boksiga bo‘lgan e’tiborni yanada oshirdilar. 2017 yil taqvimidan yosh bokschilar o‘rtasidagi ko‘plab turnirlar o‘rin olgan. 26 yanvar kuni ana shunday musobaqalarning dastlabkisi Farg‘ona viloyatining Marg‘ilon shahrida start oldi.

26-yanvar kuni mazkur maktabda boks bo‘yicha o‘smirlar o‘rtasida “O‘zbekiston boksi faxriylari xotirasiga bag‘ishlangan” xalqaro turnirning ochilish marosimi bo‘lib o‘tdi. Mazkur musobaqada O‘zbekiston o‘smirlaridan tashqari Qozog‘iston va Qirg‘izistondan kelgan yosh bokschilar o‘z kuchlarini sinovdan o‘tkazishadi.

Turnirda umumiy ishtirokchilar soni 198 nafar bo‘lib, janglar 15 ta vazn toifasida bo‘lib o‘tmoqda. Eng yengil vaznli bokchilar 42 kg.gacha bo‘lgan o‘smirlar bo‘lsa, eng og‘ir bokschilar 80 kg.dan yuqori vaznda jang olib boradilar. Umumiy hisobda musobaqada 183 ta jang bo‘lib o‘tishi ko‘zda tutilgan. 26 yanvar kuni yengil vaznlardagi janglar bilan boshlangan turnir 30 yanvar sanasigacha davom etadi.