Спорт мухлисларига яхши маълум Ўзбекистон боксчилари бугунги кунда ушбу спорт тури бўйича дунё миқёсида энг етакчилардан саналишади.

Ўтган яқин йиллар ичида боксчиларимиз нуфузли халқаро турнирларнинг деярли барчасида иштирок этиб ғолиб ва совриндор бўлишга муваффақ бўлдилар. Спортда ғалабага эришишдан кўра уни ушлаб қолиш қийинроқ деган тушунча мавжуд.

Мазкур ҳолатни яхши англаган Ўзбекистон Бокс Федерацияси мутасаддилари ўсмирлар ва ёшлар боксига бўлган эътиборни янада оширдилар. 2017 йил тақвимидан ёш боксчилар ўртасидаги кўплаб турнирлар ўрин олган. 26 январ куни ана шундай мусобақаларнинг дастлабкиси Фарғона вилоятининг Марғилон шаҳрида старт олди.

26-январ куни мазкур мактабда бокс бўйича ўсмирлар ўртасида “Ўзбекистон бокси фахрийлари хотирасига бағишланган” халқаро турнирнинг очилиш маросими бўлиб ўтди. Мазкур мусобақада Ўзбекистон ўсмирларидан ташқари Қозоғистон ва Қирғизистондан келган ёш боксчилар ўз кучларини синовдан ўтказишади.

Турнирда умумий иштирокчилар сони 198 нафар бўлиб, жанглар 15 та вазн тоифасида бўлиб ўтмоқда. Энг енгил вазнли бокчилар 42 кг.гача бўлган ўсмирлар бўлса, энг оғир боксчилар 80 кг.дан юқори вазнда жанг олиб борадилар. Умумий ҳисобда мусобақада 183 та жанг бўлиб ўтиши кўзда тутилган. 26 январ куни енгил вазнлардаги жанглар билан бошланган турнир 30 январ санасигача давом этади.