Yamaykalik yuguruvchi Useyn Bolt va uning terma jamoadagi sheriklari Pekinda 2008 yili o‘tkazilgan Olimpiya o‘yinlari estafeta bo‘yicha oltin medalini Xalqaro olimpiya qo‘mitasiga qaytardi.

Bu haqda «Kommersant’» xabar bermoqda.

«Medallarimdan birini topshirayotganim men uchun og‘ir. Biroq bunga majburman, chunki XOQ talablari shunday. Norozi ekanligimni yashirmayman, ammo o‘zimni qo‘lga oldim», — deya ta’kidladi Bolt.

Eslatib o‘tamiz, Nesta Karterdan doping tekshiruvi chog‘ida taqiqlangan modda — metilgeksanamin topilgandan so‘ng Yamayka terma jamoasi diskvalifikasiya qilindi va sportchilar oltin medaldan mahrum etildi. O‘sha estafeta yakuniga ko‘ra yamaykalik yuguruvchilar jahon rekordini o‘rnatgan edi.

Endilikda Boltning Olimpiadadagi medallari soni 8 taga qisqardi.