Xorij chempionatlarida to‘p surayotgan o‘zbekistonlik futbolchilar o‘tgan haftada turli natijalarni qayd etishdi.
*** O‘zbekiston terma jamoasi a’zosi Sardor Rashidovning klubi - «Al-Jaish» Qatar Yulduzlar ligasi 18-tur o‘yinini safarda «Umm-Salal»ga qarshi o‘tkazdi. Mazkur bahsda 1:1 hisobi qayd etildi. 70-daqiqada raqib futbolchisi maydondan chetlashtirilgan bo‘lsada, duxaylliklar g‘alabani o‘z tomonlariga og‘dirolmadilar. Sardor mazkur uchrashuvda to‘liq 90 daqiqa to‘p surdi.
*** 2 nafar hamyurtimizni o‘z safiga jamlagan «Al-Sayliya» esa «Al-SHaxaniya» mehmoni bo‘lib, ortga 1 ochko bilan qaytdi - 0:0. Temurxo‘ja Abduxoliqov ham, Sanjar Shoahmedov ham «Sayliya»ning boshlang‘ich tarkibida maydonga tushib, o‘yin oxirigacha harakatlanishdi.
*** Sanjar Tursunov ham «Al-Huraytiyat»ning «Al-Rayyan»ga qarshi uchrashuvida to‘liq vaqt o‘ynadi, ammo jamoasi 0:1 hisobida imkoniyatni boy berdi.
*** BAA chempionatida 16-tur ortda qoldi. «Al-SHabab» klubi bu safar mehmonda «Bani Yas»ni 4:2 hisobida yengdi. O‘zbekiston terma jamoasi yarim himoyachisi Aziz Haydarov mazkur g‘alabaga 90 daqiqalik faol harakati bilan hissa qo‘shdi. Ayni payt «Al-SHabab» 24 ochkoga ega va 6-o‘rinda bormoqda.
*** Malayziya premyer-ligasida 2-tur o‘yinlari bo‘lib o‘tdi. ATM klubi uning doirasida MISC mehmoni bo‘lib, 3:2 hisobida g‘alaba qozondi. E’tiborli tomoni, ATMning gollaridan biriga hamyurtimiz Pavel Smolyachenko mualliflik qildi. Aytish joiz, Iqbol Boboxonov va Sirojiddin Rahmatullayev ham aynan shu klub safida to‘p surishmoqda.
*** Malayziya super-ligasi ishtirokchisi «T-Tim» 2-turda «Paxang» maydoniga safar uyushtirib, 0:5 hisobida mag‘lubiyatga uchradi. Bu jamoa tarkibida Farhod Tojiyev va Dilshod Sharofutdinov bor. Bahs tugagach, mehmon jamoa muxlislari yirik hisobga qaramay, «T-Tim» futbolchilariga tasalli berishdi. O‘z navbatida, jamoa vakillari ularga yaqinlashib, xunuk natija uchun uzr so‘rashdi.
