"Nasaf" mavsumni chiroyli g‘alaba bilan boshladi. Qarshiliklar Osiyo chempionlar ligasi saralash bosqichi doirasida Toshkentda "Al-Hidd"ni qabul qildi va yirik hisobda zafar quchdi.
Ro‘ziqul Berdiyev shogirdlari birinchi bo‘limda ikkita "egizak" gollar urishga muvaffaq bo‘lishdi. Bahrom Abdurahimovga nisbatan ishlatilgan ikkita qo‘pollik tufayli "ajdarlar" ikkita jarima to‘pini ishlashdi. O‘ng qanotda belgilangan jarima to‘plarini Shorahmedov o‘yinga kiritdi. 16-daqiqada Shahboz Erkinov, oradan 10 daqiqa o‘tib Igor Golban bosh bilan darvozaga joylashdi.
Bundan tashqari, tanaffusga qadar Erkinov gol urish uchun yana ikkita vaziyatga ega bo‘ldi. O‘yin boshidan burchakdan yetkazilgan uzatmaga Shahboz bosh bilan bergan zarbani "Hidd" darvozani qaytarishga muvaffaq bo‘ldi. Tanaffus arafasida esa bahraynlik himoyachilarning qo‘pol xatosidan so‘ng Erkinov jarima maydonchasi ichida yolg‘iz qoldi va birga-bir vaziyatda chap oyoqda zarba berdi. Ammo to‘p ustun yonidan o‘tib ketdi.
Ikkinchi bo‘limni "Al-Hidd" hujumkor o‘tkazishga harakat qildi. Vakillarimiz ularning hujumlarini bartaraf etib, o‘zlari ham raqib darvozasiga bosim tashkil qilib turishdi. So‘nggi daqiqalarda "Nasaf" ikkita gol urishga muvaffaq bo‘lishdi. Dastlab chiroyli hujumni Narzullayev samarali yakunlagan bo‘lsa, qo‘shib berilgan daqiqalar boshlangan paytda Cheran olis masofadan aniq zarba bilan juda chiroyli gol muallifiga aylandi. 4:0!
Shu tariqa, "Nasaf" OCHL saralashining keyingi bosqichiga yo‘l oldi. Berdiyev jamoasi 7 fevral kuni Saudiyaning "Al-Fotih" klubi maydonida OCHL guruh bosqichi yo‘llanmasi uchun kurash olib boradi.
OCHL, saralash bosqichi, 16:00
"NASAF" - "AL-HIDD" - 4:0
Gollar: Shahboz Erkinov (16), Igor Golban (26), Doniyorjon Narzullayev (77), Dragan Cheran (90+1)
Ogohlantirish: Ahmad Bug‘ammar (50)
"Nasaf": 35.Sanjar Quvvatov, 2.Akmal Shorahmedov, 6.Azizjon G‘aniyev, 15.SHahboz Erkinov (Bobur Abduxoliqov 80), 18.Bahrom Abdurahimov, 20.Islom Kenjaboyev (Doniyorjon Narzullayev 69), 22.Igor Golban, 23.SHerzod A’zamov, 33.Odiljon Hamrobekov (Dilshod Rahmatullayev 86), 34.Farrux Sayfiyev, 69.Dragan Cheran
"Al-Hidd": 1.Abbos Ahmad, 2.Abdulla Fatadiy, 3.Agba Uche, 7.Muhammad al-Daud, 10.Akarandut Orok (Ahmad Ibrohim al-Xattol 56) , 15.Ibrohim el-Obaydli, 15.Sayid Muhammad Adnan, 17.Ifadayo Olusegun, 18.Isa Musabba, 23.Rashid al-Xutiy, 24.Ahmad Bug‘ammar
Bosh hakam: Nivon Robesh Gaminiy (SHri Lanka)
