O‘ta og‘ir vazn bokschilari Entoni Joshua hamda Vladimir Klichko jangidan oldin matbuot-anjumani o‘tkazildi. Jang 29 aprel kuni Londonning «Uembli» stadionida bo‘lib o‘tadi.

IBF chempioni Joshua hamda sobiq chempion Klichko jurnalistlarning savollariga javob berishdi.

Yaqinda 41 yoshga to‘ladigan Vladimir Klichko, Tayson Fyuridan qabul qilib olingan mag‘lubiyatdan so‘ng, faqatgina kamarlarni qaytib olish uchun boksni tark etmaganligini aytdi.

"Bu jangni o‘tkazish uchun hozir eng qulay vaqt. Uch yildan so‘ng men bu jang uchun qari bo‘laman, Joshua esa men uchun ancha kuchli bo‘lishi mumkin” - dedi Klichko.

Joshua esa unga ko‘pchilik Klichkoga qarshi ringga ko‘tarilishga hali erta deb aytganligini ta’kidladi. Ammo bu masalani hal qila olishga yetarli kuchi borligini aytdi.

O‘tkaziladigan jangga 90 mingga yaqin chiptalar sotilishi taxmin qilinmoqda, bu esa Britaniya orolida o‘tkazilayotgan boks janglari uchun rekord ko‘rsatkich bo‘lishi mumkin.