“Nasaf” ertaga, 7 fevral seshanba kuni Osiyo chempionlar ligasi saralash bosiqichi doirasidagi uchrashuvni Saudiya Arabistonining “Al-Fath” jamoasiga qarshi o‘tkazadi.

Uchrashuv Al-Ahsa shahridagi “Abdulla Bin Jalavi” stadionida bizning vaqt bilan soat 20:00da boshlanadi.

Mazkur uchrashuv oldidan bugun bir qator rasmiy tadbirlar bo‘lib o‘tadi. Jumladan soat 13:00da har ikkala menedjerlari va rasmiylari ishtirokida yig‘ilish bo‘lib o‘tadi. Bu yig‘ilishda uchrashuvni o‘tkazishga doir umumiy masalalar muhokama qilinish bilan birga, ertaga jamoalar qanday liboslarda maydonga tushishlari ham o‘zaro kelishib olinadi.

Matbuot anjumanini soat 16:30da mezbon jamoa - “Al-Fath” vakillari boshlab berishadi. “Al-Fath” jamoasining rasmiy mashg‘uloti ham oldinroq bo‘lib o‘tadi, ya’ni ular soat 17:30 – 18:30larda o‘yinoldi rasmiy mashg‘ulotini o‘tkazishadi.

“Nasaf” jamoamizning bosh murabbiyi Ro‘ziqul Berdiyev hamda hujumchimiz Dragan Cheranlar ishtirokidagi matbuot anjumani soat 19:00da bo‘lib o‘tadi.

Jamoamiz rasmiy mashg‘ulotni soat 19:30da boshlaydi. Rasmiy mashg‘ulotlar o‘yin bo‘ladigan – “Abdulla Bin Jalavi” stadionida bo‘lib o‘tadi.

Soatlar, o‘zimizning vaqt bilan ko‘rsatilgan.