Janubiy Koreya terma jamoasi murabbiylar shtabida yangi mutaxassis ish boshladi. O‘z vaqtida terma jamoada yulduz futbolchiga aylangan Seul Ki Xyong bosh murabbiy Uli Shtilikega yordamchi vazifasiga tayinlandi.

Koreya futbol assosiasiyasi tarqatgan xabarga ko‘ra, Seul Ki Xyong shu yilning 1 martidan rasman o‘z vazifasiga kirishadi va 2018 yilning iyun oyiga qadar terma jamoada faoliyat olib boradi.

Seul Ki Xyong JCH-2002ning nimchorak finalida Italiya terma jamoasi darvozasiga urgan goli bilan ko‘proq mashhur bo‘lgan. U Janubiy Koreya terma jamoasi safida 82ta o‘yinda maydonga tushib, 19ta gol urgan.

Shu paytgacha Koreya termasida Shtilikega yordamchilik qilib kelgan Shin Te Yong noyabr oyida mamlakat yoshlar (U20) terma jamoasiga bosh murabbiy etib tayinlangani bois, bo‘shab qolgan o‘rinni Seul Ki Xyong egallaydigan bo‘ldi.

Avvaliga KFA ushbu o‘rin uchun xorijlik mutaxassisni olib kelishni istagandi, ammo mos nomzod topilmagani uchun mahalliy mutaxassis variantida to‘xtaldi.

"Biz ko‘p vaqt ko‘ta olmasdik. Shuning uchun mahalliy murabbiyni ishga qabul qilishga qaror qildik", - deydi KFA texnik direktori Li Yong Su. "Seul Ki Xyong faoliyatining asosiy qismini Yevropada o‘tkazgan. Uning boy tajribasi va bilimi Shtilikening yonida bizga yordam beradi".

Eslatib o‘tamiz, JCH-2018 saralash bosqichida Janubiy Koreya terma jamoasi 10 ochko bilan guruhda 2-o‘rinni egallab turibdi. Guruh peshqadami Eron hisobida 10 ochko mavjud bo‘lsa, O‘zbekiston 9 ochkoga ega.