Жанубий Корея терма жамоаси мураббийлар штабида янги мутахассис иш бошлади. Ўз вақтида терма жамоада юлдуз футболчига айланган Сеул Ки Хёнг бош мураббий Ули Штиликега ёрдамчи вазифасига тайинланди.

Корея футбол ассоциацияси тарқатган хабарга кўра, Сеул Ки Хёнг шу йилнинг 1 мартидан расман ўз вазифасига киришади ва 2018 йилнинг июнь ойига қадар терма жамоада фаолият олиб боради.

Сеул Ки Хёнг ЖЧ-2002нинг нимчорак финалида Италия терма жамоаси дарвозасига урган голи билан кўпроқ машҳур бўлган. У Жанубий Корея терма жамоаси сафида 82та ўйинда майдонга тушиб, 19та гол урган.

Шу пайтгача Корея термасида Штиликега ёрдамчилик қилиб келган Шин Тэ Йонг ноябрь ойида мамлакат ёшлар (U20) терма жамоасига бош мураббий этиб тайинлангани боис, бўшаб қолган ўринни Сеул Ки Хёнг эгаллайдиган бўлди.

Аввалига КФА ушбу ўрин учун хорижлик мутахассисни олиб келишни истаганди, аммо мос номзод топилмагани учун маҳаллий мутахассис вариантида тўхталди.

"Биз кўп вақт кўта олмасдик. Шунинг учун маҳаллий мураббийни ишга қабул қилишга қарор қилдик", - дейди КФА техник директори Ли Йонг Су. "Сеул Ки Хёнг фаолиятининг асосий қисмини Европада ўтказган. Унинг бой тажрибаси ва билими Штиликенинг ёнида бизга ёрдам беради".

Эслатиб ўтамиз, ЖЧ-2018 саралаш босқичида Жанубий Корея терма жамоаси 10 очко билан гуруҳда 2-ўринни эгаллаб турибди. Гуруҳ пешқадами Эрон ҳисобида 10 очко мавжуд бўлса, Ўзбекистон 9 очкога эга.