O‘zbekiston terma jamoasi Rossiyaning “Amkar” klubiga qarshi nazorat o‘yinini o‘tkazdi va g‘alaba qozondi. Uchrashuvdan so‘ng rossiyaliklar katta murabbiyi Andrey Karyaka o‘z fikrlari bilan o‘rtoqlashdi.

- O‘yin yaxshi kurashlar ostida kechdi. Jamoamiz bir nechta golli vaziyatlarni yaratdi, ammo ulardan foydalana olmaganimiz pand berdi.

Birinchi bo‘limni yaxshi o‘tkazdik, ammo gol ura olmadik. Kostyukovga nisbatan ishlatilgan qo‘pollik uchun belgilangan penaltidan Yanush Gol foydalana olmadi (Lobanov zarbani qaytardi — stadion.uz). Ushbu vaziyatdan keyin o‘z jarima maydonchamiz ichida to‘pni yo‘qotdik va raqib futbolchisi "to‘qqizlik"ni nishonga oldi. To‘p to‘singa tegib, darvozaga kirdi.

Ikkinchi bo‘limni yaxshi boshlay olmadik. Keyin esa o‘yinni tenglashtirdik. Raqib darvozasi oldida bir nechta vaziyatlar yaratdik: birga-bir vaziyatdan foydalana olmadik, Komolov deyarli bo‘sh darvozaga zarba berdi, ammo himoyachiga tegdi. Shuningdek, Salugin va Golda vaziyatlar bo‘ldi. O‘yinni yomon o‘tkazmadik, lekin yakuniy pallada futbolchilarimiz aniq harakat qila olishmadi", - deya o‘yinga sharh berib o‘tdi Karyaka.