«Real» bosh murabbiyi Zayniddin Zidan Ispaniya chempionatining 22-turi doirasida «Osasuna»ga qarshi o‘yin (3:1) borasida o‘z fikrlarini bildirib o‘tdi.

«G‘alaba qozonganimizdan xursandmiz. Boisi, Pamplonada gol urish hamisha qiyin. Jadvalda ochkolar orasidagi farq maydonda katta ahamiyatga ega emasligini mezbonlar isbotlashdi. Jiddiy mehnat qilishimizga to‘g‘ri keldi.

O‘yin tugashiga 10 daqiqa qolganida atigi bitta to‘p bilan oldinda borish — bu qaltis vaziyat. Ba’zida o‘yin taqdirini hal qilish uchun bizga konsentrasiya yetishmaydi.

Xamesning o‘yinga qo‘shilib ketgani menga yoqdi. Uning qiyin vaziyatlardagi ishonchli harakati jamoadoshlarining yaxshiroq o‘ynashiga yordam berdi.

Daniloning jarohati tufayli taktik sxemani [3-5-2] o‘zgartirishimizga to‘g‘ri keldi, lekin, boshqa tomondan, o‘yin barqaror kechdi. Daniloning oyog‘i lat yedi. U yakshanba kuni tibbiy ko‘rikdan o‘tadi, shundan so‘ng jarohatining holati aniq bo‘ladi.

Biz 15 kun davomida o‘ynamadik, endi esa har 3 kunda maydonga tushishga to‘g‘ri keladi. Dam olgan holda chorshanba kuni bo‘ladigan o‘yinga tayyorgarlik ko‘ramiz», – dedi Zidan.

15 fevral, chorshanba kuni «Real» Chempionlar ligasining 1/8 final bosqichi doirasida «Napoli»ni qabul qiladi.