«Arsenal» yarim himoyachisi Mesut O‘zilning agenti Erkut Sogut mijozining jamoadagi vaziyati borasida o‘z fikrlarini bildirib o‘tdi. Mutaxassis va muxlislar germaniyalik futbolchini so‘nggi turlardagi o‘yini uchun tanqid qilishmoqda.

«Futbolchi yomon o‘ynaganda tanqid qilinishi — bu normal holat. Lekin Mesutning fikricha, insonlar bor e’tiborlarini uning o‘yiniga qaratishlari shart emas. Jamoaning yomon o‘yini uchun uni hamma narsaga balogardon qilishmoqda.

«Arsenal»ga qarshi o‘yinda «Bavariya» o‘yinning 74 foiz vaqtida to‘pni nazorat qildi. Bunday paytda — to‘p jamoada bo‘lmasa, qaysi futbolchi o‘z jamoasi uchun vaziyat yarata oladi? Bunday o‘yinlardan keyin insonlar narxi qimmat turadigan va ko‘p maosh oladigan futbolchilarni ko‘proq tanqid qilishadi. Ammo Mesut hamisha aybdor bo‘lavermaydi. Bu adolatdan emas.

«Arsenal» jamoaviy o‘yin borasida qiyinchiliklarga duch kelmoqda. Ammo o‘yin paytida jamoada 11 futbolchi bo‘ladi. Ammo O‘zilni alohida ajratib olib tanqid qilishyapti. «Arsenal»ning 5ta gol o‘tkazib yuborishiga aynan Mesut aybdormi?», — dedi Sogut.