O‘tgan hafta Toshkentdagi yig‘inni yakunlagan andijonliklar 20 fevraldan yana o‘z qarorgohida to‘planib mashg‘ulotlarga kirishdi.
Ikki kunlik ta’tildan so‘ng futbolchilar dushanba kuni Andijonda yig‘ilib, tushlikdan so‘ng trenajyor zalida jismoniy tomondan ishladi. Bugundan esa mashg‘ulotlar yana kuniga ikki mahaldan o‘tkaziladi. Ushbu yig‘in ikki hafta davom etadi. Bosh murabbiy Vitaliy Legayning ma’lum qilishicha, mashg‘ulotlar bilan birga yana nazorat o‘yinlari ham tashkil etiladi. Bu borada sparring raqib sifatida birinchi liga qatnashchilari bo‘lgan “Istiqlol” va “Yozyovon-Lochinlari” kabi jamoalar bilan muzokara o‘tkazilishi reja qilingan. Bungacha jamoa yig‘inida ishtirok etib kelgan G‘ayrat Jo‘rayev endilikda o‘ziga yangi jamoa topadigan bo‘ldi. Tarkibga esa Alisher To‘xtasinov bilan Davron Tursunov qo‘shilganini ma’lum qilamiz. To‘xtasinov o‘tgan mavsum “UzDongJu” sharafini himoya qilgan bo‘lsa, Tursunov mavsum-2016ni “Andijon”da boshlab, keyinchalik sog‘ligi bilan bog‘liq muammo tufayli o‘yindan tashqari xolatda qolib ketgandi. Endilikda u yana avvalgi sport formasini tiklab borishga xarakat qilmoqda.
