Madridning «Real» klubi yarimhimoyachisi Isko o‘z xohlagan taqdirda ham yozgi transferlar vaqtida «Barselona» safiga borib qo‘shila olmaydi, deb yozmoqda Mundo Deportivo.

Manba bergan xabarga ko‘ra, «Qirollik klubi» prezidenti Florentino Peres futbolchining shartnomasida kelishuv nihoyasiga yetguniga qadar zarurat tug‘ilsa «Barselona»dan boshqa istalgan klubga o‘tishi mumkin deyilgan bandni kiritgan. Agar Isko chin dildan "ko‘k-anorranglilar" safida o‘ynashni istasa, 2018 yilning yozini kutishiga to‘g‘ri keladi. O‘shanda futbolchi erkin agent maqomini oladi.

Oldinroq, Isko ko‘proq o‘yin amaliyotiga ega bo‘lish maqsadida yozda «Real»ni tark etishi mumkinligini bildirgandi. 24 yoshli futbolchining xizmatlariga Yevropaning bir qator yetakchi jamoalari qatori «Barselona» ham qiziqish bildirgan.

Joriy mavsumda futbolchi Ispaniya chempionati doirasidagi 17 uchrashuvda maydonga tushib, 5ta gol va 4ta golli uzatmaga mualliflik qilgan. U jamoa asosiy tarkibida 11 uchrashuvda maydonga tushirilgan.