Bugun "Olmaliq" Bekobodning "Metallurg" jamoasi bilan o‘rtoqlik o‘yini o‘tkazdi.
Yangi mavsum arafasidagi so‘nggi nazorat bahsida "Metallurg" jamoasi g‘alaba qozondi.
Uchrashuvning 20-daqiqasida Zabihillo O‘rinboyev hisobni ochdi. Oradan bir daqiqa o‘tib Dilmurod Karimov tomonidan urilgan gol muvozanatni tikladi. 55-daqiqada Kamoliddin Murzoyevga nisbatan ishlatilgan qo‘pollikdan so‘ng raqib darvozasi tomon penalti belgilandi. Dilshod Jo‘rayev bundan unumli foydalana olmadi. Raqib posboni Suxrob Sultonov to‘pni qaytarishga muvaffaq bo‘ldi. 78-daqiqada bosh hakam Vadim Agishev jamoamiz darvozasi tomon penalti belgiladi. Bu gal Akbar To‘rayev o‘zini ko‘rsatdi. Murod Toshmatov penaltidan unumli foydalana olmadi. Bir daqiqa o‘tib burchakdan oshirib berilgan to‘pni Islom Qobilov darvozaga yo‘lladi. Uchrashuvda so‘nggi gol uchinchi marta belgilangan penaltidan darvozaga kiritildi. Bu gal raqib futbolchisi Alisher Ziyovutdinov 11 metrlik masofadan darvozani ishg‘ol etdi.
Uchrashuv shu hisob bilan yakuniga yetdi.
