Angliya Premyer Ligasi 26-turidan o‘rin olgan «Stok Siti»ga qarshi o‘yinda «Tottenhem» futbolchisi Harri Keyn het-trik qayd etdi. Bu angliyalik hujumchi uchun musobaqadagi to‘rtinchi het-trik bo‘ldi. Shu munosabat bilan Premyer Ligada shu paytgacha eng ko‘p het-trik qilgan futbolchilar o‘nligiga nazar solamiz.
8-10-o‘rinlarni 3 tadan het-trik bilan Teo Uolkott, Jermeyn Defo va Romelu Lukaku bo‘lishib olgan. Uolkott «Arsenal» tarkibida «Blekpul», «Nyukasl» va «Vest Bromvich» darvozasiga, Defo «Tottenhem» va «Sanderlend» safida «Hall Siti», «Uigan» va «Suonsi»ga, Lukaku esa «Vest Bromvich» va «Everton» bilan «Manchester Yunayted», «Sanderlend» va «Bornmut»ga uchtadan gol urgan.
Harri Keyn 5-7-o‘rinlarni Dimitar Berbatov va Karlos Teves bilan bo‘lishib turibdi. Angliyalik hujumchi «Tottenhem» safida «Lester», «Bornmut», «Vest Bromvich» va «Stok Siti» bilan o‘yinlarda het-trik qayd etgan. Berbatov «Manchester Yunayted» safida «Liverpul», «Blekbern», «Birmingem» va «Uigan» darvozasiga, Teves «Manchester Siti» tarkibida «Blekbern», «Uigan», «Vest Bromvich» va «Norvich»ga uchtadan to‘p kiritgan.
2-4-o‘rinlarda ham 5 tadan het-trikka mualliflik qilgan uch nafar futbolchi bormoqda. Ueyn Runi «Manchester Yunayted» bilan «Portsmut», «Hall Siti», «Vest Hem», «Arsenal» va «Bolton» bilan o‘yinlarda het-trik qilgan. Robin Van Persi esa bu ishni «Arsenal» va «Manchester Yunyted» tarkibida «Uigan», «Chelsi», «Blekbern», «Soutgempton» va «Aston Villa»ga qarshi bahslarda uddalagan. «Manchester Siti» hujumchisi Serxio Aguero «Uigan», «Tottenhem», «Kuinz Park Reynjers», «Nyukasl» va «Chelsi»ga uchtadan gol urgan.
Nihoyat birinchi o‘rinda Premyer Ligada oltita het-trikka mualliflik qilgan Luis Suares yakka peshqadam bo‘lib turibdi. Urugvaylik hujumchi «Liverpul» tarkibida «Uigan», «Vest Bromvich» va «Kardiff» darvozasiga bir o‘yinda uch martadan yo‘l topgan bo‘lsa, «Norvich»ga qarshi kechgan uch o‘yinda het-trik qayd etgan. Ko‘rinib turganidek, farq unchalik katta emas hamda Runi, Aguero va hatto Keynda hozirda «Barselona»da to‘p surayotgan futbolchining natijasini takrorlash va yangilash imkoniyati bor.
