Tur sensasiyasi sifatida e’tirof etilayotgan «Metallurg» - «Dinamo» (0:2) uchrashuvidan so‘ng, samarqandliklar sardori, shu kuni jamoasining ikkinchi goliga mualliflik qilgan Akmal Bozorovning o‘yindan keyingi fikrlari bilan qiziqdik.

«Dastlabki turda Bekoboddagi o‘yin oson bo‘lmasligini juda yaxshi tushunayotgandik va buni jamoamiz asosini tashkil etayotgan yoshlarga ham tushuntirishga intildik. Shu bois butun o‘yin davomida «bir kishi hamma uchun, hamma bir kishi uchun» shiori ostida to‘p surdik. Bilasiz, tajriba bobida «Metallurg» hurmatga sazovor jamoa, bizning tarkib esa yoshlardan iborat. O‘yindan oldin ko‘pchilik jamoamizning g‘alabasiga ishonmagan bo‘lishi mumkin, ammo biz kuchli ishtiyoq evaziga yakunda g‘alaba qozonganimizdan xursandmiz. Hozirgi iqlim sharoitida maydonning holati talab darajasida emasligi har ikki jamoaga ham muammo tug‘dirdi. Oxirigacha kurashib, uch ochkoni qo‘lga kiritdik. Shu kuni bizni tinmay qo‘llab-quvvatlab turgan muxlislarning yordami katta bo‘ldi. Ularni xursand qilish uchun yanada harakat qilamiz. Shu kuni omad biz tomonda bo‘ldi. «Metallurg» jamoasini kuchli jamoa deb bilaman» - deydi «Dinamo» jamoasi sardori Akmal Bozorov.

«Ikkinchi gol? O‘yinning so‘nggi daqiqalarida mezbonlarning to‘liq hujumga o‘tishi ma’lum edi. Shu bois o‘yin oxirida maydon markazida to‘p qabul qilib olgan zahoti, hujum boshlash uchun Komil Sharofutdinovga oshirdim. Komil esa «pasi» bilan hujumga o‘tgan tezkor hujumchimiz Abdumalik Abdullayevni darvozabon bilan yakkama-yakka holatiga olib chiqdi. Abdumalik darvozabonni aldab, yo‘llagan zarbasini «Metallurg» himoyachisidan oldinroq yetib kelib, darvozaga kiritdim» - deydi goli haqida jamoa sardori.