Joriy mavsumni birinchi ligada o‘tkazadigan andijonliklarning o‘z qarorgohidagi yig‘inni kecha yakunlandi.
Endi jamoa a’zolari ertaga tushlikdan so‘ng Toshkentga jo‘nab ketishadi. Bosh murabbiy Vitaliy Legayning ma’lum qilishicha, u yerda mashg‘ulotlar bilan birga sinov-nazorat uchrashuvlari ham tashkil etiladi. Xususan, Qozog‘istonning «Kaspiy», Toshkentning «Oq-tepa», «Lokomotiv-BFK» hamda «Bunyodkor» o‘rinbosarlariga qarshi o‘yin tashkil etish ko‘zda tutilgan. Tarkibdagi o‘zgarishlarga to‘xtaladigan bo‘lsak, bungacha ko‘rikda bo‘lgan darvozabon Azizbek Abubakirov bilan «Bunyodkor» akademiyasi tarbiyalanuvchilari bo‘lgan Husniddin Husniddinov va Kamron Abduvohidov endilikda o‘ziga boshqa jamoa topishlari mumkinligi aniq bo‘ldi. Undan avval esa Alisher To‘xtasinov ham jamoa lagerini tark etgandi.
Tarkibdagi boshqa futbolchilar bilan esa shartnomalar imzolandi. Eslatib o‘tamiz Toshkentdagi yig‘in 17 martga qadar davom etadi.
