9 mart kuni soat 00:45da Chempionlar ligasidan o‘rin olgan “Barselona” – “PSJ” o‘yini o‘tkaziladi.

O‘yin Barselona shahridagi “Kamp Nou” stadionida bo‘lib o‘tadi. Birinchi uchrashuvda “PSJ” 4:0 hisobida g‘alaba qozongan. O‘yinni germaniyalik hakam Deniz Aytekin boshqaradi.

“Park De Prens” stadionida o‘tgan uchrashuv “Barselona” uchun qo‘rqinchli tush kabi esda qolishi aniq. UYEFA ta’biriga ko‘ra, bu mavsum Chempionlar ligasi sovrini uchun asosiy favorit sifatida aytilayotgan kataloniyaliklar o‘sha o‘yinda barcha jabhada raqibga mag‘lub bo‘lishdi. Lekin bu mag‘lubiyatdan so‘ng Luis Enrike shogirdlari qatorasiga 4ta uchrashuvda g‘alaba qozonishdi - “Leganes” (2:1), “Atletiko” (2:1), “Sporting Xixon” (6:1) va “Selta” (5:0).

So‘nggi natijalar parij klubiga qarshi uchrashuv oldidan o‘ziga xos tayyorgarlikka o‘xshamoqda. Luis Enrikening mavsum yakunida jamoani tark etishi esa “ko‘kanorranglilar”ni yanada ilhomlantirib yuborgandek go‘yo.

“Park De Prens”dagi o‘yinga raqibga nisbatan yaxshi tayyorgarlik ko‘rgan mezbonlar “Barselona” yetakchilarini o‘z mahoratlarini namoyish etishlari uchun hech qanday imkoniyat qoldirishmagandi. “PSJ” o‘sha uchrashuvdan so‘ng 4ta o‘yindan buyon mag‘lub bo‘lmadi. Parijliklar “Tuluza” (0:0), “Marsel” (5:1), “Nyor” (2:0) va “Nansi” (1:0) kabi jamoalari bilan kuch sinashdi.

Bundan tashqari, PSJ qatorasiga 17ta uchrashuvdan buyon mag‘lubiyat nima ekanligini bilmay kelmoqda. Ulardan 15tasi g‘alaba ekanligi esa Luis Enrikening e’tiborini tortgan bo‘lishi aniq. “Barselona” guruh bosqichida o‘rtacha hisobda har bir o‘yinda raqib darvozasiga 3tadan gol urishga muvaffaq bo‘lgan. Biroq endi kataloniyalik keyingi bosqichga o‘tishlari uchun bundan ham ko‘proq kuch sarflashi talab etiladi. Bir so‘z bilan aytganda jamoaga bu holatda faqat mo‘’jizagina yordam berishi mumkin.

Eslatib o‘tamiz, o‘yinni Uzreport TV orqali jonli efirda tomosha qilishingiz mumkin.