Xalqaro shaxmat federasiyasi – FIDE tomonidan o‘zbekistonlik shaxmatchi Sarvinoz Qurbonboyevaga xalqaro grossmeyster unvoni berildi.
Sarvinoz Qurbonboyeva 2008 yili Eronda va 2009 yili Hindistonda o‘tgan Osiyo chempionatlarida kumush va bronza medallarga sazovor bo‘ldi. 2010 yilda S.Qurbonboyeva sportda va o‘qishda erishgan katta muvaffaqiyatlari uchun Zulfiya nomidagi Davlat mukofoti hamda “O‘zbekiston belgisi” ko‘krak nishoni bilan taqdirlangan.
2011 yili Malayziyada o‘tkazilgan xalqaro turnirda birinchi o‘rinni egalladi. 2012 yili Toshkentda 20 yoshgacha qizlar o‘rtasidagi Osiyo chempionatida kumush medal, 2013 yili Birlashgan Arab Amirliklarining Sharja shahrida 20 yoshgacha bo‘lgan shaxmatchilar o‘rtasidagi Osiyo chempionati doirasida o‘tkazilgan blis-turnirda bronza medalni qo‘lga kiritdi. Ko‘plab yirik xalqaro turnirlarda sovrinli o‘rinlarni egalladi. 2014 yili xalqaro sport ustasi me’yorini bajardi. 2016 yili O‘zbekiston xotin-qizlar terma jamoasi safida Birlashgan Arab Amirliklarining Abu-Dabi shahrida o‘tkazilgan “Osiyo millatlar kubogi – 2016” xalqaro turnirida muvaffaqiyatli qatnashib, kumush medalga sazovor bo‘ldi.
