Ne bo‘ldi, nega bo‘ldi, hanuz hayronman
Yo‘qolgandek bo‘ldi qimmat bir narsam.
Ko‘z o‘ngimdan ketmas o‘shal lahzalar,
Bir mo‘jiza ko‘rsat, o‘zimni "Barsa"m!

Spaydermen, Betmen va yana kimlar,
Yordam berarmishmiyey, qandaydir Tarzan.
Maskerano, Rakitichni asosiyga qo‘sh,
Bir mo‘jiza ko‘rsat, o‘zimni "Barsa"m!

U klubdan axir kuchsiz emassan,
"PSJ" deganlarga berib qo‘y dars ham.
Inyestaga tushuntir, yaxshi o‘ynasin,
Bir mo‘jiza ko‘rsat, o‘zimni "Barsa"m!

Uchovlon shunday o‘ynangki, bu gal
To‘rtta gollar uchun qolmasin qarz ham.
Ter Shtegen ko‘z-ko‘z qil mahoratingni,
Bir mo‘jiza ko‘rsat, o‘zimni "Barsa"m!

Yaralangan sherning oldida axir,
Ip esha olmaydi hatto yo‘lbars ham.
Senga faqat "Real" teng kela olar,
Bir mo‘jiza ko‘rsat, o‘zimni "Barsa"m!

Yuz ming muxlis qo‘llab-quvvatlashi chin,
Qaniydi men ham "Kamp Nou"ga borsam.
Chanqog‘ingni bos, o‘zingga ishon,
Bir mo‘jiza ko‘rsat, o‘zimni "Barsa"m!

Ligani tark etma, sensiz qiziqmas,
Hech yarashmas ekan, e’tibor bersam.
Do‘stlarimga choyxona mendan,
Bir mo‘jiza ko‘rsat, o‘zimni "Barsa"m!

Mohir Ziyayev