Bugun futbol bo‘yicha XXVI O‘zbekiston chempionatining 2-tur uchrashuvlari davom ettiriladi.

Bu turda “Ajdarlar” “Buxoro” jamoasi bilan kuch sinashadi. Uchrashuv G‘uzor shahridagi “G‘uzor” markaziy stadionida soat 16:00da boshlanadi.

“Nasaf” bugun oliy ligadagi 590-o‘yinini o‘tkazadi. Bo‘lib o‘tgan o‘yinlarda 331 marta g‘alaba qo‘lga kiritilgan. “Qo‘qon-1912” jamoasi bilan bo‘lgan uchrashuvda Dragan Cheran jamoamizning oliy ligadagi 1070-golini kiritdi.

Bugungi uchrashuvni Andijondan tashrif buyurgan hakamlar boshqarishadi. Uchrashuv bosh hakami Timur To‘xtasinov. Unga qanotlarda Ziyodullo Abdurahmonov va Anvarjon Marajabovlar yordam berishadi. Uchrashuvning zaxira hakami etib Asker Najafaliyev tayinlangan. Hakamlar ishini bugun Radik Serazitdinov nazorat qiladi.

Bugungi uchrashuvga bo‘lgan qiziqish juda yuqori. O‘tgan turda mazkur jamoalar g‘alabaga erishgan. “Nasaf” safarda “Qo‘qon-1912” jamoasini 2:1 hisobida mag‘lub etgan bo‘lsa, buxoroliklar o‘z maydonida “Olmaliq” jamoasini kichik 1:0 hisobida mag‘lubiyatga uchratishdi.

Bugungi uchrashuvga Buxoro shahridan mingga yaqin muxlislar tashrif buyurishi kutilmoqda. O‘ylaymizki, vohamiz muxlislari ham stadionga tashrif buyurish bo‘yicha faol bo‘lishadi.