Бугун футбол бўйича XXVI Ўзбекистон чемпионатининг 2-тур учрашувлари давом эттирилади.
Бу турда “Аждарлар” “Бухоро” жамоаси билан куч синашади. Учрашув Ғузор шаҳридаги “Ғузор” марказий стадионида соат 16:00да бошланади.
“Насаф” бугун олий лигадаги 590-ўйинини ўтказади. Бўлиб ўтган ўйинларда 331 марта ғалаба қўлга киритилган. “Қўқон-1912” жамоаси билан бўлган учрашувда Драган Черан жамоамизнинг олий лигадаги 1070-голини киритди.
Бугунги учрашувни Андижондан ташриф буюрган ҳакамлар бошқаришади. Учрашув бош ҳаками Тимур Тўхтасинов. Унга қанотларда Зиёдулло Абдураҳмонов ва Анваржон Маражабовлар ёрдам беришади. Учрашувнинг захира ҳаками этиб Аскер Нажафалиев тайинланган. Ҳакамлар ишини бугун Радик Серазитдинов назорат қилади.
Бугунги учрашувга бўлган қизиқиш жуда юқори. Ўтган турда мазкур жамоалар ғалабага эришган. “Насаф” сафарда “Қўқон-1912” жамоасини 2:1 ҳисобида мағлуб этган бўлса, бухороликлар ўз майдонида “Олмалиқ” жамоасини кичик 1:0 ҳисобида мағлубиятга учратишди.
Бугунги учрашувга Бухоро шаҳридан мингга яқин мухлислар ташриф буюриши кутилмоқда. Ўйлаймизки, воҳамиз мухлислари ҳам стадионга ташриф буюриш бўйича фаол бўлишади.
