Osiyo chempionlar ligasining 3-turi doirasida bo‘lib o‘tadigan "Istiqlol" (Tehron) - "Lokomotiv" o‘yini oldidan matbuot anjumani tashkil etildi. Unda dastlab mezbonlar ishtirok etishdi. Avvaliga "Istiqlol" bosh murabbiyi Alirizo Mansurian hamda jamoa sardori Mahdi Rahmatiy jurnalistlarning savollariga javob qaytarishdi.

O‘yindan oldingi matbuot anjumanida Alirizo Mansurian quyidagi fikrlarni bildirdi:

"Biz "Lokomotiv"ni yaxshi bilamiz, ularning o‘yin uslubi bizga ma’lum. "Lokomotiv"ning "At-Ta’vun"ga qarshi uchrashuvini ko‘rdik, shuningdek, "Al-Ahli" bilan kechgan bahsini ham o‘rganib chiqdik. Jamoa yaxshi shakllangan, muhimi, raqib o‘yinida tartib-intizom bor".

Alirizo Mansurian: "To‘g‘ri, klubimizda moliyaviy muammolar bor, lekin hozir bu haqda o‘ylash kerak emas. E’tiborni ertangi o‘yinga qaratishimiz lozim. Men faqat futbol haqidagi savollarga javob qaytaraman, pul bilan bog‘liq masalalarga emas. Agar ertaga g‘alaba qozonsak, Navro‘z bayrami oldidan muxlislarimizga ajoyib sovg‘a tuhfa etgan bo‘lamiz".

Alirizo Mansurian: "Biz ham "Lokomotiv" singari bir o‘yinda g‘alaba qozonib, bir bor mag‘lub bo‘ldik. Endi bo‘lsa o‘zaro kuch sinashib ko‘ramiz va bu o‘yin juda qiziqarli kechishi kutilmoqda. Maqsadimiz — guruhda birinchi o‘rinni egallab keyingi bosqichga chiqish. Ammo bu oson bo‘lmaydi, chunki kuchli raqiblarga qarshi bahs olib boramiz".

Alirizo Mansurian: "Albatta, ertangi o‘yin final emas, lekin e’tiborga molik bo‘lishi turgan gap. Guruhdan kimlarning chiqishi menimcha, to‘rtinchi turdan so‘ng oydinlashadi. Ungacha esa bir narsa deyish qiyin. Menga qolsa, guruhdan "Istiqlol" va "Lokomotiv" chiqishini xohlayman".

"Istiqlol" klubi sardori, darvozabon Mahdi Rahmatiyning fikrlari esa quyidagicha bo‘ldi:

"Jamoamiz bu mavsum birmuncha o‘zgardi, tarkibda yoshlar ko‘p, ichki chempionatda uchinchi o‘rinda ketyapmiz. Lekin hali hammasi o‘z joyiga tushadi. Ertaga bo‘lib o‘tadigan uchrashuvda g‘alaba qozonishga harakat qilamiz".