Osiyo chempionlar ligasining 3-turi doirasida bo‘lib o‘tadigan "Istiqlol" (Tehron) - "Lokomotiv" o‘yini oldidan matbuot anjumani tashkil etildi. Uning ikkinchi qismida "Lokomotiv" bosh murabbiyi Andrey Miklyayev va jamoa himoyachisi Bobur Yo‘ldoshev ishtirok etishdi. Andrey Miklyayev savollarga javob qaytarar ekan, quyidagi fikrlarni bildirdi:
"Ertaga har ikkala jamoani qiziq o‘yin kutib turibdi deb o‘ylayman. Hozir guruhdagi vaziyat shundayki, barcha to‘rttala jamoada ham uch ochkodan bor, bu esa kurashni yanada qizdiradi. Guruhdan chiqish uchun nafaqat uyda, balki safarda ham ochko olish kerak bo‘ladi. Shu bois ertangi o‘yindan ochko bilan qaytishga harakat qilamiz".
Andrey Miklyayev: "Biz Eronda birinchi bor to‘p surayotganimiz yo‘q. O‘tgan yil bu yerda "Sepohon", undan oldin esa "Fulad"ga qarshi bahs olib borganmiz. Eronliklar futbolni juda yaxshi ko‘rishadi, ularda kuchli futbolchilar ko‘p. O‘z navbatida biz ham ulardan qolishmaymiz va buni ertaga isbotlashga harakat qilamiz".
Andrey Miklyayev: "Istiqlol"ning OCHLdagi o‘yinlarini ko‘rdik, raqib haqida yaxshi tasavvurga egamiz. Futbolchilari jismoniy jihatdan baquvvat va taktik tomonlama ham yaxshi shakllangan.
Bobur Yo‘ldoshev: "Uchrashuv qiyin bo‘lishini his qilib turibmiz. Qolaversa, "Ozodiy" stadioniga ko‘plab muxlislar kelishi kutilyapti. shunga qaramay, o‘z o‘yinimizni namoyish etgan holda g‘alaba qozonishga harakat qilamiz".
MASHG‘ULOT
"Lokomotiv" "Ozodiy" o‘yingohida 19:00dan 20:00ga qadar mashg‘ulot olib bordi. Ertaga ushbu stadionga ko‘p muxlis kelishi kutilyapti. Bizga ma’lum bo‘lishicha, darvozalar ortidagi sektorlarga kirish bepul, markaziy sektorlar uchun esa 5 dollardan chipta sotilmoqda. (Albatta, Eron pulini AQSH dollariga o‘girganda). "Temiryo‘lchilar"ni ertangi bahsga qancha tomoshabin kelishi o‘ylantirayotgani yo‘q, chunki barchaning maqsadi Tehrondan g‘alaba qozonib qaytib ketishga qaratilgan. Jamoada hammasi joyida va yigitlar bo‘lajak o‘yinga tayyorlar. Shu o‘rinda "Istiqlol" bilan kechadigan uchrashuvda "Lokomotiv"ga omad yor bo‘lishini tilab qolamiz.
