Londonning «Chelsi» klubidagi faoliyati bilan yaxshi tanish bo‘lgan ganalik yarim himoyachi Maykl Essyen o‘z faoliyatini Indoneziya chempionatining yuqori ligasi – Liga 1 vakili «Persib Bandung» jamoasida davom ettiradi. Bu haqda «Bola.com» xabar bermoqda.

Graphic Online nashrining qayd etishicha, 34 yoshli futbolchi 2017/18 yilgi mavsum yakuniga qadar Indoneziya klubida to‘p suradi.

Uning yillik maoshi 800 ming yevroni tashkil qilishi va u Indoneziyada eng serdaromad futbolchiga aylanishi ta’kidlanmoqda. Ganalik tajribali futbolchi yangi klubida 5-raqam ostida harakat qiladi.

2014 yilgi Indoneziya chempioni «Persib Bandung» o‘tgan mavsumni 5-o‘rinda yakunlagan edi.

Mavzuga doir: Xitoy futbol klublari yaxshi futbolchini tekinga ham olishni biladi: «Chelsi»dagi Obi Mikel «Tyanszin Teda»ga o‘tdi.

Ma’lumot uchun, Maykl Essyen professional faoliyati davomida Fransiyaning «Bastiya» (2000–2003) va «Lion» (2003–2005) klublarida, «Chelsi» (2005–2014), «Real Madrid» (2012–2013, ijara), «Milan» (2014–2015) va «Panatinaikos» (2015–2016) jamoalarida to‘p surgan.