O‘z tarixida ilk marta Yevropa chempionlar ligasida ishtirok etayotgan Angliyaning "Lester" klubi chorak finalga chiqishga muvaffaq bo‘ldi. "Tulkilar" nimchorak finalda "Sevilya"ni musobaqadan chiqarib yuborishdi.

Birinchi bo‘limda inglizlar "standart" orqali hisobni ochdi: Morgan to‘pni darvozaga burib qo‘ydi. Bu hisob "Lester"ni to‘la qanoatlantirardi. Shu bois, ular zich himoyani yuzaga keltirishdi.

Ikkinchi bo‘lim boshida Shekspir shogirdlari kam sonli hujumlardan birini golga aylantirishdi. Qanotdan yetkazilgan uzatmani himoyachi bosh bilan qaytardi. To‘pni egallagan Olbrayton jarima maydonchasi chizig‘i ustidan darvozani ishg‘ol qildi.

O‘yinning qolgan daqiqalarida "Sevilya" to‘pni nazorat qilish bo‘yicha katta ustunlikka ega bo‘ldi, ammo raqib mudofaasini yorib o‘tishga qiynaldi. Boz ustiga bahsning 74-daqiqasida Vardi "tulki"lik qildi va Nasrinig maydondan chetlatilishiga erishdi. Jeymi "provakasiya" uyushtirdi va Samir uning peshonasiga boshini qo‘ygan zahoti o‘zini jabrlanuvchi qilib ko‘rsatdi. Hakam har ikkala futbolchiga sariq kartochka berdi. Bu Nasri uchun ikkinchisi edi.

Shunga qaramay, oradan ko‘p o‘tmasdan, andalusiyaliklar penalti ishlashga muvaffaq bo‘lishdi. Nzonzining zarbasini Kasper Shmeyxel mahorat bilan qaytardi. Yodingizda bo‘lsa, Sevilyada bo‘lib o‘tgan dastlabki o‘yinda ham ushbu posbon penaltini bartaraf etgandi.

Qolgan daqiqalarda "Lester" yaxshi himoyalanishda davom etdi. Hattoki qarshi hujumda gol urish uchun 2ta imkoniyatga ega bo‘ldi, ammo ulardan foydalana olmadi.

Shu tariqa, debyutant "Lester" yevrokuboklarda ishtirok bo‘yicha katta tajribaga ega bo‘lgan "Sevilya"ni YECHLdan chiqarib yubordi.

YECHL, nimchorak final, javob o‘yini, 00:45
"LESTER" - "SEVILYA" 2:0 (1:0)
Gollar: 1:0 – 27 Morgan, 2:0 – 54 Olbrayton.
Noaniq penalti: Nzonzi (80, darvozabon)
Lester – Shmeyxel, Morgan, Fuks, Simpson, Xut, Drinkuoter, Ndidi, Olbrayton, Marez (Amarti, 90), Okadzaki (Slimani, 64), Vardi.
Sevilya – Riko, Parexa, Rami, Eskudero, Merkado (Mariano, 46), Nzonzi, Sarabiya (Yovetich, 46), Nasri, Iborra, Vitolo, Ben-Yedder (Korrea, 68).
Ogohlantirishlar: Nasri (18), Vitolo (59), Vardi (74), Shmeyxel (79), Ndidi (84), Mahrez (89).
Chetlatish: Nasri (74).
Birinchi o‘yin: 2:0