O‘zimizga bog‘liq bo‘lmagan holda bizni ta’qib qiladigan yaxshilik ham, yomonlik ham aslida nisbiy. Biz o‘z munosabatimiz va harakatlarimiz orqali, har qanday yaxshilikni yomonlikka, yomonlikni yaxshilikka aylantirishga qodirmiz. Boylik isrof tufayli yomonlikka, kasallik esa, sabr tufayli, yaxshilikka aylanganidek…
Bastian Shvayshtayger – nemis futboli afsonasi. Jahon chempioni. “Bavariya” safida to‘rt yuzga yaqin o‘yinda maydonga tushib, yigirmadan ortiq sovrinlar yutgan. Uning nomi doim mana shu klub bilan bog‘lanadi va doim birga tilga olinadi.
U “Manchester Yunayted”ga katta maqsadlar bilan kelgandi, klub muxlislari aynan Bastiandan jamoani eski darajaga qaytishida katta xissa qo‘shishini umid qilgan bo‘lishsa-da, unday bo‘lib chiqmadi. U jamoa safida atigi 18 o‘yinda maydonga tushdi. Faqat 2015 yilning dekabrida “Lester” darvozasiga va yaqinda, “Uigan”ga qarshi kechgan kubok uchrashuvida gol urdi. Lui van Gaal davrida Bastian asosan jarohatlar girdobida qolgan bo‘lsa, Mourinyo unga ishonch bildirmadi. Nihoyat, Bastian Shvayshtayger MLS klubi bilan shartnoma imzolab, AQSH ga jo‘nab ketmoqda. Bir qaraganda, omadsiz transfer. Umuman bekor ketgan ikki yil. Bir qaraganda…
Bilasizmi, Bastian Shvayshtayger kabi futbolchilar faqatgina maydondagi chiroyli o‘yinlar, gollar yoki golli paslar orqali esda qolmaydilar. Ular futbolda sadoqat, jasorat, qat’iyat, professionalizm timsoli bo‘ladilar, tom ma’nodagi shaxsiyatga aylanadilar.
Aynan shu nuqtai nazaridan, Bastianning aynan “Manchester Yunayted”dagi faoliyati juda muhim ahamiyat kasb etadi. U haqida kelajakda eslanganda, kitoblar yozilganda, uning nafaqat “Bavariya”dagi sovrinlari-yu gollari, Manchesterdagi buyuk namunasi tilga olinaveradi.
Joze Mourinyo yozda jamoa murabbiyiga aylangach, birinchi ishi o‘ziga kerak bo‘lmaydigan futbolchilarni aniqlab olish edi. Joze Manchesterga kelmasidan oldin Shvayshtayger uning rejalariga kirmasligiga qaror qilib bo‘lgandi. Boshqalardan farqli o‘laroq, Bastianga imkon ham berilmadi, hatto mavsumoldi yig‘inlarda futbolchiga jamoa bilan birga mashg‘ulotlarda qatnashishga ruxsat tegmadi ham.
“Men mavsumda o‘zimga kerak bo‘ladigan 23 futbolchini aniqlab oldim, boshqasi kerak emas” – dedi Joze Mourinyo.
Albatta, klub murabbiyning aytganini qiladi, Bastianni sotishga hech kim qarshi emasdi. Ammo futbolchi klubda mo‘may shartnomaga ega, har qanday klub ham uni sotib olishga ep ko‘rmas, Bastianning o‘zi esa, o‘zi yoshligida muxlislik qilgan “MYU” tarixida iz qoldirish umididan voz kechmasdi.
