«Barselona» rahbariyati «Real» yarim himoyachisi Iskoni qo‘lga kiritish uchun jiddiy harakatlarni boshlab yuboradi.

Ma’lumotlarga qaraganda, Isko 2018 yilning yozida "Real" bilan shartnomasi yakuniga yetib, "ko‘k-anorranglilar" safiga erkin agent sifatida qo‘shiladigan bo‘lsa, kataloniyaliklar futbolchiga 20 million yevro ko‘tarma puli va’da berishdi. "Barsa" Ispaniya terma jamoasi futbolchisiga besh yillik shartnoma taklif qilmoqda va ko‘tarma puli ushbu davr mobaynida unga to‘lab boriladi. Bundan tashqari, «Barselona» Iskoga ancha yuqori maosh to‘lashga tayyor. Futbolchi ushbu taklifga hozircha aniq javob qaytarmadi.

Mazkur mavsum davomida Isko yetarli o‘yin amaliyotiga ega bo‘lmayotgani bois, "Qirollik klubi"ni tark etishi mumkinligi haqida bir necha marta xabarlar tarqatilgandi. Shuningdek, "Real" rahbariyati Isko "Barselona"ga o‘tib ketishini oldini olish maqsadida mavsum so‘ngida uni boshqa jamoaga sotib yuborishi mumkin. Shu bois, kataloniyaliklar futbolchining 2018 yilda "Real"ni erkin agent sifatida tark etib, "Barselona"ga o‘tishiga umid qilishmoqda.

Isko Ispaniya La ligasining ushbu mavsumida 22ta o‘yinda ishtirok etgan bo‘lsa, ularning 13tasini asosiy tarkibda boshlagan. U bu o‘yinlarda 6ta gol urdi va 4ta golga assistentlik qildi.