“Million” jamoasi boshlovchisi Davron Kabulov o‘zining ijtimoiy tarmoqlardagi sahifasi orqali futbol bo‘yicha O‘zbekiston milliy terma jamoasiga bosh murabbiy bo‘lishga tayyorligini bildirdi.

“Murabbiylik tajribam yo‘qligini yuzimga solishmasa, “qo‘ng‘iroqlar” bilan tarkib tanlashga aralashishmasa, O‘zbekiston MTJni JCHga olib chiqa olaman. Tekinga, pul kerakmas. 4 yil Vatanim uchun oyliksiz ishlashga tayyorman. “Boshlovchiligingni qilsang-chi”, degan gaplarga shoshilmang: termamizni shu vaqtgacha Sarkisyan, Mirsodiqov, Vega da Silva, Salkov, Nepomnyashiy, Abramov, Qosimov, Babayan kabi “tan olinganlar” boshqardi, olib chiqolmadi JCHga. Hech narsa yo‘qotmaysiz, eplolmasam, 6 marta chiqolmagan mundialga 7 marta chiqmagan bo‘lasiz. Va’damning ustidan chiqsam, TARIXDA BIRINCHI MARTA bo‘ladi. Jiddiy aytyapman. Agar natija oldingilaridan yomon bo‘lsa, yashab turgan uyimni o‘rtaga tikishga tayyorman!”, deb yozadi Davron Kabulov.

Bu bilan Davron Kabulov nima demoqchi? Boshqa soha odami bo‘la turib, Samvel Babayan bosh murabbiy bo‘ldi-ku, men ham bir urinib ko‘ray, demoqchidir, bunisi bizga qorong‘u.

Eslatib o‘tamiz, O‘zbekiston milliy terma jamoasi JCH saralashi doirasida safarda Suriyaga qarshi imkoniyatni boy bergandi. Ertaga Toshkentda Qatar terma jamoasini qabul qiladi.