O‘zbekiston milliy terma jamoasi Qatarga qarshi 12 ta bellashuvda ishtirok etgan.
O‘zaro o‘yinlardagi ustunlik O‘zbekiston tomonida. Hamyurtlarimiz 7 marta g‘alaba qozongan, 2 o‘yin durang natija bilan tugagan, 3 bora qatarliklarning qo‘li baland kelgan. To‘plar nisbati – 21:13, bizning foydamizga.
Qatar terma jamoasi Toshkentga jami 4 bor tashrif buyurgan bo‘lib, ularning hammasida imkoniyatni boy bergan.
1. 2001 yil. JCH-2002 saralashi. O‘zbekiston – Qatar – 2:1
2. 2006 yil. Osiyo kubogi - 2007 saralashi. O‘zbekiston – Qatar – 2:0
3. 2009 yil. JCH-2010 saralashi. O‘zbekiston – Qatar – 4:0
4. 2013 yil. JCH-2014 saralashi. O‘zbekiston – Qatar – 5:1
O‘zbekiston milliy terma jamoasi Qatar darvozasiga 12 o‘yinda 21 ta gol urgan. Shularning 15 tasi JCH saralashida urilgan bo‘lsa, undan 13 tasi Toshkentda nishonlangan.
Qatar terma jamoasi darvozasiga eng ko‘p gol urgan o‘zbekistonlik futbolchilar Mirjalol Qosimov va Farhod Tojiyev hisoblanadi. Tojiyev 2009 yilning 28 mart kuni xet-trik qayd etgan. Qosimov esa Qatarga qarshi bo‘lib o‘tgan dastlabki uch o‘yinning har birida muvaffaqiyat qozongan. Bahodir Nasimov va Odil Ahmedov Qatar darvozasiga ikki martadan yo‘l topgan.
Qatar darvozasiga gol urgan va ayni paytda ham milliy terma jamoada faoliyatini davom ettirayotgan futbolchilar soni ikki nafar — Server Jeparov va Odil Ahmedov.
