Samarqandlik muxlislar tashkil etgan Navro‘z bayrami tadbiri yakunida "Dinamo" jamoasi nomidan Ilhom Sharipov ishqibozlarga minnatdorchilik bildirdi.

«Avvalo, muxlislarimizga mana shunday e’tibor va qo‘llab-quvvatlash uchun minnatdorchilik bildiraman. Bugun muxlislar singari futbolchilar ham ishqibozlar bilan uchrashib, bir dasturxon atrofida to‘planib, yaxshi taassurotlar olishdi. Mana shunday yuzlab jonkuyar muxlislarimiz borligi bizning yutug‘imizdir. Jamoamizning muvaffaqiyatlarida ham so‘zsiz muxlislarning o‘rni juda katta. Ular 12-o‘yinchimiz, xoh Samarqandda o‘ynaylik, xoh Toshkent, Bekobod yoki vodiyda bo‘lsin doimo jamoamizni qo‘llab-quvvatlashmoqda. Muxlislarning daldasi futbolchilar uchun juda muhim. Hali mavsum oldinda. Muxlislarimiz har qanday holatda ham bizni qo‘llab-quvvatlashda davom etsalar, «Dinamo» jamoasi ham maydonda eng avvalo ular uchun bor kuch va g‘ayratini ishga soladi» - dedi Ilhom Sharipov.