Самарқандлик мухлислар ташкил этган Наврўз байрами тадбири якунида "Динамо" жамоаси номидан Илҳом Шарипов ишқибозларга миннатдорчилик билдирди.
«Аввало, мухлисларимизга мана шундай эътибор ва қўллаб-қувватлаш учун миннатдорчилик билдираман. Бугун мухлислар сингари футболчилар ҳам ишқибозлар билан учрашиб, бир дастурхон атрофида тўпланиб, яхши таассуротлар олишди. Мана шундай юзлаб жонкуяр мухлисларимиз борлиги бизнинг ютуғимиздир. Жамоамизнинг муваффақиятларида ҳам сўзсиз мухлисларнинг ўрни жуда катта. Улар 12-ўйинчимиз, хоҳ Самарқандда ўйнайлик, хоҳ Тошкент, Бекобод ёки водийда бўлсин доимо жамоамизни қўллаб-қувватлашмоқда. Мухлисларнинг далдаси футболчилар учун жуда муҳим. Ҳали мавсум олдинда. Мухлисларимиз ҳар қандай ҳолатда ҳам бизни қўллаб-қувватлашда давом этсалар, «Динамо» жамоаси ҳам майдонда энг аввало улар учун бор куч ва ғайратини ишга солади» - деди Илҳом Шарипов.
