Yaqinda Ispaniya chempionati tarixida eng yirik hisoblardan biri qayd etildi.
Ispaniyaning 3-divizionida «Barselona B» yoshlar jamoasi «Eldense» klubini 12:0 hisobida mag‘lub etdi. Bu sharmandali natijadan so‘ng, «Eldense» klubi musobaqada ishtirok etishdan bosh tortdi.
Ammo voqea bu bilan yakunlanmadi. Bugun «Eldense» hujumchisi Sheyk Saad o‘yinning kelishilgan ekani haqida bayonot berdi.
«Bu mojaroda 4 nafar futbolchi ishtirok etdi. Ularning ismini bilaman, ammo aytolmayman. Uchrashuvdan oldin jamoadoshim: «O‘yin kelishilgan bo‘ladi. Ishtirok etasanmi?» - deb so‘radi. Men rad javobini berdim. O‘yin boshlanishidan yarim soat oldin zaxirada qolganimni bildim.
Bahs tugagach, o‘yinni sotgan futbolchilar nomini bilib oldim. Keyin kiyinish xonasida janjal boshlanib ketdi, hatto mushtlashuvgacha bordi. «Barselona B» bu ishga aralashmadi, ular hech narsani bilmas edi. Ular maydonda o‘z ishini bajardi xolos» - dedi Saad.
