Яқинда Испания чемпионати тарихида энг йирик ҳисоблардан бири қайд этилди.

Испаниянинг 3-дивизионида «Барселона Б» ёшлар жамоаси «Эльденсе» клубини 12:0 ҳисобида мағлуб этди. Бу шармандали натижадан сўнг, «Эльденсе» клуби мусобақада иштирок этишдан бош тортди.

Аммо воқеа бу билан якунланмади. Бугун «Эльденсе» ҳужумчиси Шейк Саад ўйиннинг келишилган экани ҳақида баёнот берди.

«Бу можарода 4 нафар футболчи иштирок этди. Уларнинг исмини биламан, аммо айтолмайман. Учрашувдан олдин жамоадошим: «Ўйин келишилган бўлади. Иштирок этасанми?» - деб сўради. Мен рад жавобини бердим. Ўйин бошланишидан ярим соат олдин захирада қолганимни билдим.

Баҳс тугагач, ўйинни сотган футболчилар номини билиб олдим. Кейин кийиниш хонасида жанжал бошланиб кетди, ҳатто муштлашувгача борди. «Барселона Б» бу ишга аралашмади, улар ҳеч нарсани билмас эди. Улар майдонда ўз ишини бажарди холос» - деди Саад.