“Buxoro”ning xorvatiyalik legioneri Ivor Veyser jamoaning safardagi barcha gollariga mualliflik qilmoqda.
“Nasaf” va “Qizilqum”ga qarshi kechgan uchrashuvlarda “Buxoro”ning yagona goliga aynan Veyser mualliflik qildi. Navoiydagi bahsdan so‘ng ushbu futbolchi o‘z fikrlarini bildirdi.
“Avvalambor barcha muxlislarimizni safardagi ilk g‘alaba bilan tabriklayman. “Qizilqum”ga qarshi uchrashuv biz uchun juda og‘ir kechdi. Jamoa ketma-ket ikki mag‘lubiyatdan so‘ng ushbu bahsda qanday bo‘lmasin g‘alaba qozonishi shart edi. Bu g‘alabadan so‘ng turnir jadvalidagi pozisiyamiz ham ancha yaxshilandi, biz chempionat liderlari bilan ochkolarimiz tafovutini ko‘payib ketishiga yo‘l qo‘ymasligimiz kerak. Umumiy qilib aytadigan bo‘lsam, “Qizilqum” bilan o‘yinda biz har bir santimetr uchun kurashdik, oxirgi soniyalargacha kurashni to‘xtatmadik. “Qizilqum” jamoasiga hurmatimni saqlagan holda aytishim mumkin-ki, biz haqli g‘alabaga erishdik.
Men “Buxoro”ga kelishdan oldin tabiiy-ki, jamoa haqida ma’lumot yig‘dim. O‘tgan mavsumda ushbu jamoa 4-o‘rinni egallabdi va sovrindor bo‘lishiga oz qolgan edi. Meni diqqatimni tortgan boshqa jihat bo‘ldi. Ushbu jamoa muxlislarining ko‘pligi meni hayratga soldi. Har bir uy uchrashuvlariga 20 ming va undan ziyod muxlis tashrif buyurishini eshitib lol qoldim, ishonmadim. Lekin klub saytidagi suratlarni tomosha qilar ekanman, bunga o‘z ko‘zim bilan guvoh bo‘ldim, darhaqiqat stadion liq to‘lar ekan.
Dastlabki tur uchrashuvida o‘z uyimizda “Olmaliq” bilan o‘ynadik. Bu uchrashuvda ham aynan shunday atmosfera guvohiga aylanishga umid qilgan edim, afsus-ki negadir muxlislar kam kelishdi. Stadion yarmi bo‘sh turgani dilni xira qildi. Yil boshida jamoa a’zolari tubdan o‘zgartirildi, balki muxlislar yangilarga sal ishonchsizroq nazarda qarashayotgandir va shu sababli stadionga kelmayyotgandir. Vaqt o‘tgan sayin biz albatta muxlislarimizni stadionga qaytaramiz va ularning bizga nisbatan ishonchlarini yana uyg‘otishga harakat qilamiz. Men umid qilaman-ki, keyingi uy uchrashuvlarimizda stadionga yanada ko‘proq muxlis tashrif buyuradi. Ertakdagiday go‘zal Buxoro” shahri va uning xalqi ulkan g‘alabalarga loyiqdir. “Buxoro” jamoasi mana shunday muxlislari bilan albatta xorijiy arenalarni ham zabt etishi shart!”-dedi Veyser.
