Jurnalistlar surishtiruvi xalqaro konsorsiumi (ICIJ) yakshanba kuni offshor hisob raqamlari to‘g‘risida yangi ma’lumotlarni oshkor qildi.
Hisobotlar offshor hududlarda kompaniyalarni ro‘yxatga olishda huquqiy yordam ko‘rsatuvchi Panamaning Mossack Fonseca idorasi hujjatlari asosida tuzilgan. Unga ko‘ra, Mishel Platini UYEFA prezidentligiga saylangan yili offshor kompaniya ochish uchun Mossack Fonseca xizmatlaridan foydalangani ma’lum bo‘ldi.
Bundan tashqari, Mossack Fonseca hujjatlarida «Barselona», «Manchester Yunayted» va «Real» klublarida o‘ynagan 20 nafarga yaqin futbolchilarning ismi tilga olingan.
Xususan, «Barselona» hujumchisi Lionel Messi va uning otasi Mega Star Enterprises offshor kompaniyasiga egalik qilgan. Uning nomi 2013 yil 13 iyun kunidan boshlab Mossack Fonseca hujjatlarida tilga olingan.
Ayni paytda, Messi va uning otasi soliqlarni to‘lashdan bo‘yin tovlaganlik aybi bilan Ispaniyada sudlanmoqda. Uning jinoyat ishi bo‘yicha hukm 20 aprel kuni chiqariladi.
Ma’lumot o‘rnida, offshor kompaniya – soliqlardan ozod qilingan hududda ochilgan firma bo‘lib, soliq to‘lashdan qochish va daromadlarni yashirish maqsadida foydalaniladi.
