«Atletiko» yarimhimoyachisi Koke «Real»ga qarshi o‘yin arafasida qurolli hujum jabrdiydasiga aylandi.
Ispaniyalik futbolchi avtomobillarning to‘xtash joyidagi to‘siq oldiga kelib, chipta olish maqsadida avtoulov oynasini tushirdi. Shu zahotiyoq uning yoniga motosikl mingan shaxs kelib, qurol o‘qtaldi va barcha qimmatbaho narsalarini berishni talab qildi. 25 yoshli futbolchi unga narxi 70 ming yevro turadigan soatini berishga majbur bo‘ldi. Shundan so‘ng jinoyatchi voqea joyini tark etdi.
Koke bu haqda polisiyaga xabar bergan. Ayni paytda jinoyatchi qidirilmoqda, deb xabar beradi El Mundo.
Eslatib o‘tamiz, 8 aprel kuni "Atletiko" Primeraning 31-turida "Real"ga qarshi o‘ynaydi.
