Namanganda Oliy liganing 5-turidan o‘rin olgan “Navbahor” va “Mash’al” jamoalari bahsi o‘z nihoyasiga yetdi.

Qiziqarli va keskin kurashlarga boy kechgan uchrashuvda maydon egalari kichik hisobda g‘alaba qozondi. O‘yindagi yagona golga “Navbahor”ning 3-raqamli o‘yinchisi Hasanboy Ergashev mualliflik qildi.

O‘yindan so‘ng o‘tkazilgan matbuot anjumanida mehmonlar bosh murabbiyi Aleksandr Xomyakov ishtirok etdi va o‘yin haqida o‘zining qisqacha fikrlarini bildirib o‘tdi.

"O‘yin qiyin o‘tishini avvaldan bilgan edik. Bugun har ikkala jamoa oldinga o‘tib o‘ynashini kutgandik. Bugungi o‘yindagi shogirdlarimning harakatlariga e’tirozim yo‘q, bugun meni faqat natija qoniqtirmadi.

Biz birinchi bo‘limda ko‘proq hujum qildik, ikkinchi bo‘limda esa qarshi hujum taktikasida o‘ynadik. Biroq, bizga omad kulib boqmadi. Faqatgina bir vaziyatda, burchak zarbasida xatoga yo‘l qo‘ydik va bu bizga qimmatga tushdi" - dedi Xomyakov.