OCHL–2017 turniri “A” guruhi 4-turidan o‘rin olgan “Lokomotiv” – “Istiqlol” (1:1) urashuvidan keyin tashkil etilgan matbuot anjumanida “temiryo‘lchilar” ustozi Andrey Miklyayev hamda uchrashuvning eng yaxshi futbolchisi Ikrom Aliboyev ishtirok etib, o‘z fikrlarini bildirib o‘tdi.

“Uch ochko qo‘lga kiritishga yaqin edik, kayfiyatimiz uchnalik yaxshi emas. Ikkinchi bo‘limda o‘yinimiz o‘xshamadi. G‘alaba qozonish uchun maydonga tushgan edik. Masharipovning Krizoga almashtirilishi xato emas. Hisob 1:1 bo‘lgan vaziyatda Bikmayev gol urishga yaqin edi. Krizo esa o‘sha hujumda to‘pni saqlab qolgandi.

Har ikki jamoa maydonga kurashish uchun maydonga tushadi. Ikkinchi bo‘limda maydon markazida o‘yinni boy berdik. Muhim futbolchilarimiz Temur Kapadze va Salamat Qutiboyev yo‘qligi bilindi. O‘yin yakunidagi xatoliklar zanjiri raqibning gol urishiga olib keldi. Bugungi o‘yin natijasiga qaramay, guruhdan chiqish uchun imkoniyatimiz bor”, – dedi Andrey Miklyayev.

“Afsuski, bugun ochko yo‘qotdik. Buning uchun muxlislardan uzr so‘raymiz. Nasib qilsa keyingi o‘yinlarda g‘alaba qozonib, guruh bosqichidan chiqishga harakat qilamiz”, – dedi Ikrom Aliboyev.