Yevropa ligasining chorakfinalidan o‘rin olgan «Lion» - «Beshiktosh» o‘yini noma’lum vaqtga kechiktirilgan edi.
Gap shundaki, «Lyumyer» stadioniga yig‘ilgan turkiyalik muxlislar maydonga yugurib chiqib, tartibsizliklarni yuzaga keltirishdi. Ularni orqaga qaytarmoqchi bo‘lgan styuardlar bilan mushtlashib ketishdi. Bundan tashqari maydonga turli buyumlar va fayerlarni uloqtirishdi. Natijada o‘yinning boshlanish vaqti noma’lum muddatga kechiktirildi.
Shundan so‘ng, «Lion» prezidenti Jan-Mishel Olyas tartibsizlik uyushtirgan muxlislar orasiga kirib, ularni tinchlantirishga muvaffaq bo‘ldi. Taxminan 1 soatdan so‘ng, muxlislar maydonni tark etgach o‘yin boshlandi.
